Араван районунун айыл аймактарынын бюджетинде 5 млн 322.6 миң сом суммасында каржы бузуулары аныкталды

2021-2022-жылдар аралыгында Араван районунун социалдык-экономикалык өнүгүүсүн талдоосуна, айылдык аймактардын бюджеттеринин түзүлүшүнө жана аткарылышына жүргүзүлгөн аудиттин жыйынтыгы боюнча, 5 млн 322.6 миң сом жалпы суммасында каржы бузуулары аныкталды.

Аудиттин жүрүшүндө, ири суммадагы төмөнкүдөй каржы бузуулары аныкталды:

жалпысынан 5 млн 322.6 миң сомдук финансылык бузуулар аныкталды, анын ичинен жетишпестиктер 57,2 миң сом, каражаттарды сарптоодо кетирилген кемчилдиктер жана бузуулар 4960,1 миң сом, анын ичинен:

• эмгек акыны негизсиз төлөөлөр 224,2 миң сом;
• негизсиз чыгышталган акча каражаттары 127,5 миң сом;
• сапар чыгымдарына ашыкча төлөөлөр 47,1 мин сом;
• каражаттарды казыналыктан сырткары жумшоо 71,0 мин сом;
• курулуш иштерине кошуп жазуулар 4002,3 миң сом;
• бюджеттик каражаттарды максатсыз пайдалануу 423,5 миң сом;
• бухгалтердик эсептен дебитордук карыздарды жашыруулар 64,4 миң сом;
• бюджетке кошумча кирешелерди эсептөө 196,9 миң сом;
• социалдык фонддун бюджетине кошумча кирешелерди эсептөө 108,4 миң сомду түзгөн.

Аныкталган финансылык бузуулардын ичинен өндүрүүгө жатканы 5154,7 миң сом болсо, анын ичинен аудит убагында өндүрүлүп, ордуна коюлганы 1731,0 миң сом жана өндүрүлбөй калганы 3423,7 миң сомду түздү.

Жогоруда аталган финансылык бузуулардан сырткары 2369,2 миң сомдук бюджеттик жоготуулар жана резервдер аныкталды, анын ичинен:

• күйүүчү майларды ченемден ашыкча сарптоо 86,6 миң сом, андан 24,2 миң сом ордуна коюлган;
• эмгек акы төлөөдө кетирилген бузуулар 264,6 мин сом;
• электр энергиясын пайдалануудагы эрежелерди бузган себептүү салынган жазаналар 2018,0 миң сом;
• мамлекеттик сатып алууларды жүргузүүдөгү рационалдуу эмес пайдаланылган каражаттар 153,5 миң сом.

Аудиттин жыйынтыгы менен электр энергиясын пайдаланууда ири өлчөмдөгү бюджеттик жоготууларга жол берген Тепе-Коргон жана Керме-Тоо айыл өкмөттөрүнүн орто аралык актылары жана Тепе-Коргон айыл өкмөтүндөгү бюджеттик каражаттарды өздөштүрүүдө жол берилген 72,2 миң сомдук кошуп жазуулар боюнча материалдар укуктук баа берүү үчүн Ош облустук прокуратурасына жиберилди.